Qalamnii cobsinu
booruu bonaatii
awwaara gannaatii
tikfatatuu deegaa
deettutuu maseenaa
maseenni taadhomee
faana finnaa dhabnaa
faana faanoo dhoofnee
deeffanna mirga uumaa!!…..
Kun kakuu kakkaan deegamee
kun erbuu nam-tokkee mitii
irbuu dhaloonnii seenee
dhaloonnii man-tokkeemii
luqqifamee hindhumuu
booji’amee hinsarmuu
taliigaa abbaa ebaluu
taliigaa warra kaanii
jedhee dantaa nam-tokkee
yookaan garee man-tokkee
jedhee walin shukkuumuu
kana’n shakkin yaa nama
miliniyeemiin kumaa…
Tokko shaneen miliyoonaa
akkamiin mee haguugaa
hindeebisuuf ree dhugaa
miliyoona afurtamaa!!
Kun ragaa biirootiimii
ragaa biiroo herregaa
isa barbaade baasee
isa barbaade rigaa
isa lakkoofsa faa
Haguuguu yaalu dhiiga
kana miti jechi koo
kanan an jedhu raaga!
Raaga biyya ‘oromi
tan amma ‘miyaa’n ta’in
tan hadhaa alagaatiin
jaarraa lammataa keessas
lammiidhaaf hinmi’aayin
waa’ee sabaa dubbannaa
sobni diinaa nu raa’iin….
Ganaa warra harkaa walnyaatee
ganyaa awwaala waldhoowwate
maali ganyaan akkanaa?
Kan waan jedhu waakkate!
Nuganyaa akkanaa hinqabnuu
jedhee wal-iyyaafatee
iyyata jira sabni dhalli isin himate!!
Isiniin jedha isin warrii
waaree waa kaa’ee…
Waarii dur dur haasa’ee
kakuufi irbuu seentan
waakkin lafa haxaa’ee
akkamiin umrii dhumaan
akkamiin dungoo rirmaan
seenaa keessan haaltanii?
Seera uumaa ganamaa
galgala qabrii kanaan
kadu’a heduu wajjiin
kadu’ee bulaa wajjiin
reeffa aanaa rarraaftan?
Aarii sabaa awaaltan!!
Gumaa hayyuu darbee
gumaa dhiiga roobee
hegeree dhalootaa
dhaloota dorrobee
maalin bakka buuftuu?
Aarsaa kichuu ilmaa
qeerroowwan jajjabee
maallaqaf qabeenyaan
deebii saba kennaa
nufuudhittuu duubee?!
Qananii hawaasaa
akkamiin herregnaa
quufa saba bal’aa
akkamiin himannaa?
Qananiifi quufni
saba bal’aa kanaa
aangessuudha miti
nama-tokkoo-lamaa!!
Badhaadhinni ijoon
inni waliigalaa
mirga deeffachuudha
mirga uumaa keenyaa
kan sarbamne jaarraa!!
————————————————-
Kan Walaleesse: Eebba Coqorsaa